1. febrúar 2024 /
Heilbrigðisráðuneytið

Um 180 milljóna króna viðbótarfjármagn til hjúkrunarheimila

Willum Þór Þórsson heilbrigðisráðherra
Stjórnarráðið
Willum Þór Þórsson heilbrigðisráðherra

Willum Þór Þórsson heilbrigðisráðherra hefur ákveðið að auka fjármagn til hjúkrunarheimila um 181 milljón króna á þessu ári til að mæta aukinni hjúkrunarþyngd íbúa. Með þessu er mætt ákvæði bókunar sem gerð var við framlengingu samninga Sjúkratrygginga Íslands (SÍ) við rekstraraðila hjúkrunarheimila í mars árið 2022. Með bókuninni er gert ráð fyrir að sýni mælingar á hjúkrunarþyngd (RUG stuðull) þörf fyrir aukið fjármagn komi SÍ þeim upplýsingum á framfæri við heilbrigðisráðherra sem geti þá brugðist við með viðbótarframlagi til rekstrarins.

Öll hjúkrunarheimili framkvæma reglulega svokallað RAI-mat sem felur í sér mat á hjúkrunarþörf og heilsufari íbúa á hjúkrunarheimilum með áherslu á gæði þjónustunnar sem veitt er. Niðurstöður þessara mælinga eru lagðar til grundvallar við veitingu fjármagns til hjúkrunarheimilanna (RUG-stuðlar). Hjúkrunarþyngd íbúa á hjúkrunarheimilum hefur aukist umtalsvert á liðnum árum og hefur sú þróun haldist í hendur við hækkandi meðalaldur íbúa heimilanna. Hlutfall íbúa sem eru 90 ára og eldri hefur farið hækkandi en lækkað í aldurshópnum 80-89 ára.

„Við sjáum í þessum tölum samfélagslega og lýðfræðilega þróun. Hlutfall aldraðra af þjóðinni fer hækkandi og þeim fjölgar sem ná háum aldri. Fólk sem þarf á hjúkrunarheimili að halda er því að jafnaði eldra en áður og í þörf fyrir meiri þjónustu. Ásamt þessu viðbótarframlagi hefur markvisst verið unnið að því að auka möguleika fólks á því að búa lengur heima í sjálfstæðri búsetu, m.a. með aukinni heimaþjónustu og fjölgun dagdvalarrýma. Þá hefur kraftmikil samvinna Samtaka fyrirtækja í velferðarþjónustu, heilbrigðisráðuneytis og Landspítala skilað lausnum til að takast á við aukið álag í heilbrigðiskerfinu“ segir Willum Þór Þórsson heilbrigðisráðherra. 

Var efnið hjálplegt?