Reykjanesbraut tvöföld frá Hafnarfirði til Reykjanesbæjar með nýjum vegarkafla

Eyjólfur Ármannsson innviðaráðherra opnaði í dag nýjan tvöfaldan vegarkafla á Reykjanesbraut fyrir umferð, á milli Krýsuvíkurvegar og Hvassahrauns. Þar með er Reykjanesbraut tvöföld alla leið frá Hafnarfirði til Reykjanesbæjar. Auk ráðherra klipptu Bergþóra Þorkelsdóttir, forstjóri Vegagerðarinnar, og Valdimar Víðisson, bæjarstjóri Hafnarfjarðar, á borða af þessu tilefni. 

Umferðin á Reykjanesbraut hefur aukist jafnt og þétt undanfarna áratugi og því var mikilvægt að aðskilja akstursstefnur á veginum til að auka öryggi vegfarenda.

„Aðskilnaður akstursstefna á Reykjanesbraut hefur reynst afar mikilvæg aðgerð við að fækka slysum og auka umferðaröryggi. Tvöföldun brautarinnar greiðir einnig fyrir mikilli umferð á einum fjölfarnasta vegi landsins. Við munum áfram leggja mikla áhersla á að aðskilja akstursstefnur í fjölmörgum samgönguframkvæmdum sem framundan eru,“ segir Eyjólfur Ármannsson.

Framkvæmdir á undan áætlun

Framkvæmdir hafa gengið framar vonum og því er hægt að opna brautina fyrir umferð nú í desember. Einhver frágangur verður unninn í vetur og fram á vor. Verklok eru áætluð í júní 2026.

Verkefnið á vegarkaflanum Reykjanesbraut (41) Krýsuvíkurvegur-Hvassahraun fólst í breikkun Reykjanesbrautar á 5,6 km kafla frá Krýsuvíkurvegi að enda fjögurra akreina brautarinnar á Hrauni vestan Straumsvíkur.

Vegurinn var breikkaður í 2+2 aðskildar akreinar, mislægum vegamótum við álverið í Straumsvík, ISAL, var breytt og útbúnar vegtengingar að Straumi og Álhellu. Byggð voru mislæg vegamót við Rauðamel og útbúnar vegtengingar að Straumsvíkurhöfn og dælu- og hreinsistöð austan Straumsvíkur með undirgöngum. Einnig voru gerð undirgöng fyrir gangandi og hjólandi rétt austan við álverið sem og eftirlitsstaðir fyrir umferðareftirlit beggja megin Reykjanesbrautar, austan við Straumsvík.