26 verkefni hljóta styrk úr Þróunarsjóði innflytjendamála

Styrkir úr Þróunarsjóði innflytjendamála fyrir árið 2026 voru veittir á viðburðinum Lykill að samfélaginu sem innflytjendaráð stóð fyrir nú í morgun. Alls hlutu 26 verkefni styrk.

Það voru Tomasz Chrapek, formaður innflytjendaráðs, og Ragnar Þór Ingólfsson, félags- og húsnæðismálaráðherra, sem afhentu styrkina. Ragnar Þór benti í ávarpi sínu á að verkefnin væru vítt og breitt um landið og tækju á ólíkum þáttum í takt við áherslurnar í ár.

„Með því að virkja mannauðinn sem til er í landinu byggjum við til framtíðar, til þess er Þróunarsjóður innflytjendamála og það gerir það fólk sem fær hér styrk í dag,“ sagði ráðherra.

Auglýst var eftir umsóknum um styrkina í sumar og var áhersla lögð á verkefni sem stuðla að virkri notkun íslensku í daglegu lífi, verkefni sem styðja ungt fólk sem er nýkomið til landsins og foreldra framhaldsskólanema af erlendum uppruna og verkefni sem vinna gegn fordómum, hatursorðræðu og rangfærslum í stafrænu umhverfi.

„Verkefnin sem við fögnum í dag hjálpa okkur að sjá hvert annað skýrar. Þau leiða fólk saman og skapa tækifæri til að læra og taka þátt. Þau sýna að við getum eflt íslenskuna og um leið virt þau tungumál og þá reynslu sem fólk hefur með sér,“ sagði Tomasz Chrapek, formaður innflytjendaráðs, á viðburðinum í morgun.

Alls voru veittir styrkir fyrir 68.580.000 kr. og hlutu eftirfarandi verkefni styrk: